到底點解想學手沖？

知道自己搵緊啲咩

早排有位客人喺網上 DM 我，問「手沖物理學 101」。

佢話自己以前飲咖啡好是但，近來開始一間間小店去試，飲到唔同嘅烘焙同沖煮風格，又買過掛耳包返屋企自己沖。沖咗幾次，覺得都應付得嚟，於是想正式學。

我冇即刻叫佢報名，只係請佢先嚟店入面飲一杯。

因為我哋呢個研習系列要處理嘅，好少係「唔識沖」。更多時候，係一啲已經做慣、靠感覺完成，但每次結果都唔太一樣嘅習慣。

所以，先嚟飲一杯，聽下我點樣理解一杯咖啡、點樣拆解沖煮入面發生緊嘅事，再判斷呢個係咪你真正想「修行」嘅方向。

結果，佢發覺自己只係一時興起，都係出去飲輕鬆啲。我覺得咁都好好，最緊要開心。

老生常談：工多藝熟

另一個下晝，遇到另一位客人。

介紹菜單嗰陣，知道佢對沖煮好有興趣，於是我一路沖，一路講每個步驟背後發生緊嘅物理現象。

佢聽得好投入，不停拋出自己嘅睇法，有幾條問題甚至推住我作出更大膽嘅假設。最後我哋索性即場改變沖煮條件，再沖多一杯，睇下結果係咪真係如推論咁發生。

咁樣一來一回、有方向、又帶實驗性嘅交流，其實唔常有。

後來得知，佢一直有喺屋企自己沖，基本概念早就有。佢需要嘅，唔係多記一套罐頭配方，而係用更科學嘅方法，將自己嘅經驗整理好：邊個因素影響邊個結果、點樣提高穩定性，更重要嘅係，點樣面對唔同產區、品種、處理法同烘焙。

只係生活太忙，有時間嚟上堂，但練習機會同時間都唔多。還好正確嘅概念都到位，只要記得學咗嘅物理限制，仍然可以增加沖煮出合理風味嘅機率嘅。

講到尾，勤於練習先係重點。學任何一種手藝都係。

先練，再鑽研

年多前，我結束咗「初階手沖研習班」，同時開發而家嘅「手沖物理學」系列，目的好簡單：將呢門手藝嘅學習曲線畫清楚啲。

如果只係想輕輕鬆鬆學基本功，嚟一邊飲一邊學已經足夠。基本功最重要嘅，唔係咩 4:6 沖法、攪唔攪拌、用咩濾杯，而係實實在在咁練。

練習，熟練，再鑽研。講真，得呢條路行得通。

當你開始想鑽研，就係「手沖物理學」出場嘅時候。

破舊立新，成自己風格

有系統嘅學習，要有完整嘅結構。

第一節，係「破」。 講得誇張少少，係破舊立新嘅破。

將你習慣咗嘅直覺同動作逐一拆開嚟對質：啱用嘅，令佢更穩固；唔啱用嘅，放低佢。

落水之後發生咩事？注水高度同速度嘅影響？粉床會點變？流速如何改變？萃取喺咩情況下會變得唔均勻？呢啲平時肉眼睇唔到嘅現象，最後又點樣反映喺風味、口感同餘韻上？

逐樣理解，對照你過往嘅經驗，再重新建立一套方法。

第二節，係「立」。 即係將呢套方法實踐出嚟，不斷修正，直至變成你自己嘅風格。

中間你會有不少於三星期時間練習，然後將結論帶返嚟，我哋一齊拆：邊啲改變真係有效，邊啲只係偶然；邊方面開始穩定，邊方面仲喺探索緊。

由呢啲結果，慢慢生出屬於你嘅沖煮方式，同埋遇到問題時嘅解決方法。呢個，先叫做沖煮風格。

所以我唔希望大家嚟上完堂，淨係記得「幾多克、幾多度、幾多秒」。

我更想你知道：why。

後記

大部分有興趣報名嘅參加者，都會將唔同地方嘅課程擺埋一齊比較：內容、導師背景、證書認受性，甚至上完對入行有冇幫助。準備入行嘅人咁諗，好合理。

我哋嘅目標就單純得多，只係希望你學識：

用合乎物理嘅方式沖煮，將手上咖啡豆本身嘅風味同口感，穩定而平衡咁呈現出嚟。

唔再靠運氣沖下一杯。知道每一杯好飲、唔好飲嘅原因，而且有能力處理下一杯。

可以重複、可以判斷、遇到變化仍然知道點應對，咁嘅技術，先值得你投放時間同金錢去鑽研。

手上有一套可以依靠嘅知識，沖咖啡先唔會係偶然。

上完堂係咪就係專業？當然唔係啦。但帶住呢套思考同觀念，不停練習同嘗試，必然會對你想成為一個專業水吧呢條路，有實際而長遠嘅幫助。

如果你仲諗緊，自己想要嘅係一套「黃金沖法」，定係一套理解沖煮咖啡嘅觀念，不妨先嚟 90° Sensory Lab 飲一杯，探索一下。

如果你心入面已經有一套概念，想印證一下，或者想用科學角度理解呢門手藝——

咁我想相信你真係 ready 嚟上堂啦。