一杯咖啡嘅風味，由邊度嚟？

紫霞仙子

近排手頭上有支豆，幾乎每個飲佢嘅客人飲完都講同一句說話：

「好紫。」

眯埋眼，一整個紫色畫面衝入腦袋。薰衣草同紫羅蘭嘅花香打頭陣，托住提子、布冧、藍莓呢啲強烈而鮮明嘅果味，尾韻係酸甜交錯嘅莓果。就連飲完個杯乾晒，杯底嘅餘香都仲係一陣藍莓醬味。

佢係嚟自埃塞俄比亞 Guji 嘅 Uraga 產區，由 Layo Washing Station 透過厭氧日曬處理嘅 Heirloom，淺烘。

不約而同是否巧合？

最有趣嘅係，唔同客人冇傾過偈，飲完都不約而同講出「紫色」嘅巧合。

濃而不膩，豐富而清爽。作為一支淺烘豆，口感順滑，果甜鮮明，餘韻長而溫和，好多人第一啖都會被呢個平衡度驚豔到。

咁呢份「紫」，究竟又係由邊度嚟㗎呢？

風土、海拔、處理法，一層疊一層的加成

先講風土。Guji 嘅 Uraga 一向以花香同莓果調性聞名，呢個可以話係支豆本身嘅底色。

再講海拔。大部分莊園都位於超過 2000 米嘅高地，日夜溫差大，咖啡果實熟得慢，有時間累積更濃郁嘅香氣，同更有層次嘅果甜。

最後係處理法。厭氧日曬，等於將本身已經熟透、深色嘅果實進一步放大乳糖發酵嘅濃度，令成個風味輪廓嘅色調更鮮明、更立體。

所以如果要我分析，呢杯嘅紫調，唔係單靠一樣嘢，而係產區打底、海拔養成、處理法放大，一層疊一層出嚟嘅加成效果。

「我喺屋企都沖到咁嗎？」

每次有人問呢條問題，我都會咁講：

一棵蘋果樹上面嘅一百個蘋果，甜度同熟度都唔會個個一樣，更何況係由唔同小農收集、再處理、包裝、分批烘焙嘅咖啡豆？

所以嚴格嚟講，要沖到一模一樣，係冇可能嘅。

但係只要參數接近，特別係水質、研磨度、水溫、粉水比同沖煮時間，越接近，風味方向，甚至最後嘅結論，自然都會越接近。

如果你想沖出「呢批豆最正路嘅風味」，關鍵唔係抄一條配方，而係用一套可跟隨由合乎物理嘅沖煮方法。有咗呢個基礎，建立同執行一條自己鍾意嘅配方，其實唔難。

所以我哋要追嘅唔係複製上一杯風味，而係有根有據咁好好控制下一杯結果。

你嘅杯入面，又會係咩顏色？

呢支豆唔知截稿時仲有冇現貨，有的話你可以買返屋企，試下沖出屬於你嘅「紫霞」。

如果你沖完覺得「好似差少少」，又想知道差喺邊、點樣調，歡迎嚟上「手沖物理學」。我哋一齊拆解，由下一杯咖啡開始，揭開佢張風味地圖。